Makaweres fer Unempfindliche

Wolfgang Käser

• Verlag: Books on Demand
• Jahr: 2016
• ISBN drucken:
  9783739241340
• eBook-ISBN:
  9783741215568
• Auflage: 1
• Thema: Literature
• Thema: Poetry

Des sin lauder Gedichtelcher un Korzgschischde in pälzischer Mundart. Makawer un manchesmol a schun sehr makawer. Dialekt liest sich schwerer, deshalb hämmer e grösseri Schriftart gewählt. Awwer lese mussmer schun kenne. Alla dann viel Schbass an de Frääd.

Sein letschder Wille –

sein ledschde Schbaß

Dunkle Gschalde, Weiblein und Männlein, einische gemessenen Schrittes, annere in faschd peinlicher Eile, weilse so noch en guude Platz in de Trauerhall vewische wollen, um dann dem Verschdorwene die letzte Ehre zu erweisen, wie des so schä hääst.

Verdient hodder die Ehre ned. Viel Leid hodder in rücksichtloser Weise um Hab un Gut gebrocht. Zu Lebzeide hodder behaupt, er kennt iwwer Leiche geh, wann ihm jemand was Urechtes nochsaache kennt. Vun noochweise wa kä Redd. Jetz isser selbscht e Leich un kann doher kä Eifluss mehr nemme. Sollt mer määne, gell? Weit gfehlt! E erbarmungloses Gezänk um des enorme Vermöge solld sich noch johrelang hiezieh. Genau des hodder sich gewinscht. Dementschbrechend hodder soi Teschdament a so gschickt verfasst, dasses faschd vun alle Beteeilischde agfochde werre kann. Noch im Agsicht vun soim Dood hodder e hässlichi Fratz gezooche, wie er sich die Gsichter vun soine Erwe vorgschdellt hot.

Soi drei Ehefraue zu beobachde wars schun wert, dass mer hiegange is.

Die Lisbeth, also die Elise, hotter seit schun zwäedreischisch Johr vorher geheirat ghabt. Die Zwää hänn sehr gut zuenanner gebassd. Sie wolld Geld..un er hots ghatt. Vun de Lieb wa do selde die Redd. So wiese grad gewollt hänn, sinse mol do unne mol do newenaus gange. Die Lisbeth wa e ausnehmend schääni Fraa., die ihn a ganz schää ausgenumme hot. Sie hot sich a in Gesellschaft gut benemme kenne. Sie hoddem a niemols noigeredd.

Fer ihn wa sie soi Vorzeigemodel. Sie hot gewisst, wiese bei de Leid gut akummt un wiese sich fer die Männer begehrlich mache gekennt hot.

Zeh Johr wa sie die Vorzeigedaam. Bis die Clarissa kumme is.

Clarisssa hot amol „NÄÄ“ gsaat, des warer so was vun iwwerhaupt ned gewehnt.

Bis jetz hoddder jedi, die er gewollt hot, ins Bett griggt. Diesmol hodder Pech ghabt. Zuerscht warer gekränkt, schdinksauer. Des wollder ned uff sich sitze losse. Awwer a de negschde Versuch is denewe gange. Awwer so schnell gibt unsern Held jetz doch ned uff. Wer warer dann? Sowas konntmer mit ihm ned mache! Mit ihm net!!!

Er hot agfange, sie zu verwehne un sie hot keinerlei Hemmunge ghatt, soi grossziegische Gschenke azunemme. Am Afang hodder des alles als Schbielerei empfunne, doch langsam isser ugeduldisch worre, ja schun e bissel zornich. Sie hot agedeit, gezögert, hot so gedu als deedse ball soim Charme unerligge. Doch er hot mache kenne wasser gewollt hot un dann letzschtendlich hodder unnerwürfisch gewinselt.

Genau dodruf hotse gewaht, die Clarissa.

Sie hodden zu sich häm oigelaade, hodden imme faschd durchsischdische Gewand empfange. Des Owwerdeel hotse schdramm un ihrn Buse richtisch zur Geltung kummend hochgebunne un an ihrm lange Hals verknotet ghatt. Ihr Bä hoddmer mehr als erahne kenne im abgedunkelte Licht.

Dodebei hotsem ganz dief in soi Aache geguggt.

Do hodder schunemol e bissel iwwerleggt, wie er de Ausdruck vun ihre Aache deute soll un er hot gemähnt, ebbes Drohendes zu entdecke. Sie is uff ihn zugange bisse uffrecht vor ihm gschdanne is. Dann hottse e Büchel Hoor gschnappt un hottem de Kopp noch hinne geboche un ihn an de Hoor zum Disch gschlebbt. Er wa nimmi er selbschd, hot sich iwwerhaupt net gewehrt. Clarissa hodden vun soim Sakko befreit, dann hotse soi Krawatt un soi Hemd vun de Bruscht gerisse, hodden rickwärts uff de Disch gschmisse un is iwwer ihn hergfalle. Brutal un wild. Die Fingernäggel hottse in soin Owerkörwer gekrallt. Sie hot wie wild so äfach weidergemacht. Sie hot a ned uffghert, alser schun gewinselt hot, die sollde doch uffhere. Un als sie genuch ghatt hot, hot sie den total erschöpfte Kerl äfach vum Disch gschmisse. Soe hodden dann äfach ligge losse un is ausem Raum verschwunde.

Langsam, sehr langsam isser uffgschdane, hot sich noch e pamool am Disch feschdghalde un is dann im Bad verschwunde..

Ab jetz, warer der Clarissa ausgeliffert. Er wa fasziniert, ageekeld, unnerwürfisch, korz: er wa ihr ausgeliffert. Vun de Lisbeth hodder sich scheide losse.

Jetz warer schun iwwer fuffzisch, do hodder die Monika kennegelernt. Die Moni wa um die fimpfezwanzisch, hübsch un intelligent, grad ferdisch middem Schdudium. Sie wollt Karriere mache un hot änner gebraucht, derere dodebei hilft.

Un sie hod Geld gebraucht. Un wo werd e solchi Fraa fündisch? Na klar, bei emme Mann. Beime Mann iwwer fuffzisch.

Wasse dodefor du muss, wa ihr klar, des hoddse oigeplant. Jetz waadse blos noch uff de rischdiche Moment. Un der is kumme. Unsern Freund, wammern emol so nenne wollen, is mid e paa Herre nooch ännere Sitzun in die Hotelbar zu emme Absagger kumme. Un dann des gleiche Schema wie immer. Zuerschd hawwen sich die Männer ganz entschbannt unnerhalde, henn e bissel wennicher un viel mehr a e bissel mehr gedrunke, sin in Schdimmung kumme un lossen dann die Aache schweife. Noch dem Moddo: Ebbes geht immer. Die Dame un Dämelcher vor un hinner de Thek, kennen des Schbielche. Mer wa no ned in ännere billsche Abschdeige, sondern imme erschdklassische Haus.

Dementsprechend a die Dame. Die Blicke vun unserm Held un Moni henn sich gedroffe. Bald hodmer sich zusamme amme klenne Disch zusammegfunne. Er hot sich ned allzulang bemiehe misse. Sie wa sehr entgegekummend, lieb un aschmiegsam. Befürchtunge brauchte känni zu hawwe. Ihr Benehme wa einwandfrei. Soi zwätti Fraa Clarisse, vun der er sich langsam entwöhnt ghabbt hot, is grosszügisch abgfunne worre.

Jetz hodder die Moni geheirat.

Vertraglich is vereinbart worre, dass sie ohne Abfindung odder so gschiedene Leid weren, wann sie sich mid emme annere Mann oilosse deed. Er wa schließlich faschd dreisisch Johr älder. Offiziell hodder mit soine drei Ehefraue kä Kinner ghatt.

Jetz warer dood. Er hots gscbbiert, dasses langsam zu End geht. Un deswege sorgder jetz devor, dasser uff längere Zeit ned vergesse werre deed.

Zuneggschd lhodder sich vun Moni scheide gelosst, sie is halt mehrere aussereheliche Beziehunge beschuldischd worre, obwohl des ned gschdimmt hot. Dann hodder de letschte Akt oigfädelt.

Er hot zur gleiche Zeit drei gleichlautende Teschdamende uffgsetzt un bei drei verschiedene Awält hinnerleggt. Gleizeidisch hodder soi ehemalische Gattine wisse losse, dass sie die Alleinerbin weer.

Jetz hänn dann bei de Beerdischung die Fraue newenanner in de erschde Reih gschdonne. Wies bei so Leid ieblich is, herschde e gschbielde Herzlichkeit unnerenanner. Jedi vun denne hot gedenkt, wann die anner blos wissden, dass ich die Allleinerbin bin, deedense ned so freundlch gugge. Dasse sich gedeicht hawwen, hawwense erschd schbeeder erfahre. Wie vun dem Kerl vorausgsehe, hots en johrelanger Rechtsstreit gewwe.

Wie hod de...

Inhaltsverzeichnis

• Inhaltsverzeichnis
• Ich hab jo nimmi soooooo lang
• Dem Pitter soin Dood
• Die Truerredd
• E Dutt wo e Dittl gelangt het
• De Hicks
• De Karl un de Petrus
• Rechts frei
• De Leicheschmaus
• Die Selbschmörderin
• Des Jubiäum
• Friedhofstraatsch
• Dande Lissl
• Doodesazeige
• Bember hämmer zuem gsaat
• Drei Johr
• En Schbaziergang iwwer de Friedhof
• Daachesmeldunge
• Soin letschder Wille
• Mil e bissel rhoilännisch
• Schdandhaft
• Moi Beerdischung
• De dridde Sarg
• Wer des alles gschriwwe hot
• Impressum