Opern auf Bayrisch - 1. Akt

Paul Schallweg

• Verlag: Rosenheimer Verlagshaus
• Jahr: 2014
• eBook-ISBN: 9783475543722
• Thema: Medien & darstellende Kunst
• Thema: Opernmusik

Mozart, Verdi und Wagner einmal anders! Paul Schallweg hat den Inhalt bekannter und beliebter Opern in originelle Mundartverse gegossen und eine höchst vergnügliche Lektüre geschaffen. In diesem Sammelband sind nun endlich seine berühmtesten Opern zu finden. Von Aida - dem Liebesdrama am Nil nach'm Verdi-Sepp - über Der fliagade Holländer bis zu Carmen oder Tannhäuser: alle sind hier versammelt und vor oder nach, anstatt oder während eines Opernabends gleichermaßen empfehlenswert!

Don Giovanni auf Bayrisch

oder
Der Graf Hallodri von Lenggrias

Frei nach der Oper von Wolfgang Amadeus Mozart

Erster Akt

Z’Lenggrias is Feierabend gwen.

Es war a Tag mit starkn Föhn.

A scharfer Mond am Himme steht.

In Wegscheid läutn s’ zum Gebet.

’s Brauneck werd schwarz, a Stern leucht her,

der Himme dunklt mehr und mehr.

Der Koiwehof liegt in der Ruah,

es geht scho glei auf neune zua.

Ma mag no net ins Haus neigeh,

der Abnd herauß is so vui schee.

De Arwad ruaht, as Herz werd weit,

der Tag sinkt nunter – Hoagaschtzeit.

Vom Tal raus weht a warmer Hauch.

Am Bankerl neban Fliederstrauch

sitzt ’s Annamirl, de Händ im Schoß.

Der Ottokar, wo bleibt er bloß?

»Am Dienstag um a neune rum,

konnst rechnen, daß i zu dir kumm.«

So hat er gsagt, der Ottokar,

der pünktlich wia a Zoager war.

Und kaam er jetzt, waarn s’ ganz alloa.

Der Vadda woit heut nix mehr doa,

er hoit den starkn Föhn net aus,

er müaßad no a wengerl raus,

so hat er gsagt, er möcht zum Wirt,

da gang a Schafkopf zamm zu viert.

O, wenn der Ottokar nur kaam,

heut paßad alles so schee zamm,

de ganzn Umständ, einfach ois

und sie war bizlad bis zum Hois.

Doch jetza, an der Leitn hint,

da siecht ma, daß wer runterkimmt!

Und is inzwischn aa scho Nacht,

des flotte Gangwerk, des er macht,

der broate Oberlandlerhuat,

– da schiaßt’s ihr aa scho nei ins Bluat! –

des is ihr Bua! Und scho rennt s’ los,

schneidt d’Kurvn ab durch’s nasse Gras.

Der ander geht glei auf sie zua.

»Ja weils d’ nur da bist, liaba Bua!«

sagt sie und wirft se an sei Brust.

– Im nächstn Augnblick hat s’ gwußt,

daß des a ganz a andrer war

und niamois net ihr Ottokar.

Sie reißt den Kopf hoch, schaugt’n o.

Und er sagt: »Madl, jetzt bist dro!

Hast gmoant, i bin der Ottokar,

ois ob des grad so wichtig waar!«

und packt sie glei krawottisch zamm.

»I liab di, Madl, derfst mirs glaam!«

Sie kennt des Gsicht und aa de Stimm.

»Du Wüastling!« schreit s’ im wuidn Grimm

und reißt se los und rennt davo.

»Geh zua, i hab dir doch nix do!«

schreit er und laft dahinter her,

da steht a Haufa in der Quer.

Sie ziahgt a Gawe aus’m Mist.

»A Graf wuist sei – a Hamme bist!«

Geht mit de Zinkn auf eahm los,

an Graf werd de Gefahr zu groß,

er draaht se um und laft davo,

de Zinkn nah am Hintern dro.

Sie treibt’n nei ins Eck vom Stoi

und woaß dann doch net recht, was soi,

schmeißt d’Gawe weg und rennt ins Haus

und woant se aufm Diwan aus.

Der Graf, des muaß i schnell erklärn,

is oana von de feiner Herrn,

de nur ’s Vergnügn woin und sonst nix

und de mit raffinierte Tricks

auf fesche Weiber spekuliern.

Was anders hat er net im Hirn.

Er war fast ständig auf der Roas

und immer nur auf Liabschaft hoaß.

Und war sei Interesse groß,

dann ladt er ’s Madl auf sei Schloß.

Sagt ’s Madl, daß net kumma kannt,

dann geht de Gschicht aa ambulant.

Und alles klappt, ois wia am Schnürl,

– nur heut grad net mitn Annamirl.

Sei Nama is net weiter gfragt.

I sag euch nur, wia d’Leut habn gsagt:

»Sperrts d’Madln weg, nehmts ’s Gwehr in Hand,

– der Graf Hallodri is im Land!«

An Diener hat er aa no ghabt,

der is eahm dauernd nachetrabt.

Der war im Dienst bei Tag und Nacht

und hat eahm d’Weiber zuawebracht.

Sei Nama der is Uli gwen.

Was der erzählt, des werds dalebn.

Der Koiwevadda sitzt beim Wirt.

Es geht koa Schafkopf zamm zu viert.

Er trinkt ...

Inhaltsverzeichnis

• Cover
• Titel
• Worum geht es im Buch?
• Impressum
• Inhalt
• Aida: oder Das Liebesdrama am Nil nach’m Verdi Sepp
• Carmen: oder Wia d’Liab an Sepp zum Mörder gmacht hat
• Turandot: oder Wia a chinesische Prinzessin à la tatar kloakriagt wordn is
• Der Fliagade Holländer: oder Wia de Zenze von Leoni durch ihran Opfertod an Seefahrer aus der Verdammnis grett’ hat
• Madam Batterflei: oder Wia a herzloser Ami a liebs kloans Japaner-Madl sitzen hat lassen
• Der Ring des Nibelungen / Das Rheingold: oder De Gschicht von de goidana Äpfe
• Die Walküre: oder Das Heldendrama am Watzmann
• Siegfried: oder Der Kampf mit dem Drachenviech
• Götterdämmerung: oder Wia zum Schluß ois hi war
• Don Giovanni auf bayrisch: oder Der Graf Hallodri von Lenggrias
• Die Meistersinger von Miesbach: oder Wia der Oberförster Stolz den Stadtschreiber Beck ausgstocha hat
• Salome: oder Wia der Prophet Jochanaan verratn, versuacht und köpft worn is
• Der Freischütz: oder Wia a Jaager auf net ganz saubere Weis zu seim Wei kemma is
• Der Lohengrin von Wolfratshausen: oder Weil d’ Weiber oiwei ois wißn müaßn
• Rigoletto: oder Der Graf von Dachau
• Der Bajazzo: oder Der Jaager vom Spitzingsee
• Tannhäuser: oder De Venus in der Kampenwand
• www.rosenheimer.com