Text und Übersetzung

Joachim Latacz, Martin West, Joachim Latacz, Joachim Latacz, Martin West

• Verlag: De Gruyter
• Jahr: 2017
• ISBN drucken: 9783110466393
• eBook-ISBN: 9783110467871
• Auflage: 1
• Thema: Literatur
• Thema: Antike & klassische Literaturkritik

Keine ausführliche Beschreibung für "Text und Übersetzung" verfügbar.

ILIAS 4

TEXT UND ÜBERSETZUNG

Οἱ δὲ θεοὶ πὰρ Ζηνὶ καθήμενοι ἠγορόωντο

χρυσέῳ ἐν δαπέδῳ· μετὰ δέ σφισι πότνια Ἥβη

νέκταρ ἐῳνοχόει, τοὶ δὲ χρυσέ͜οις δεπάεσσιν

δειδέχατ’ ἀλλήλους, Τρώων πόλιν εἰσορόωντες.

5 αὐτίκ’ ἐπειρᾶτο Κρονίδης ἐρεθιζέμεν Ἥρην

κερτομίοις ἐπέεσσι, παραβλήδην ἀγορεύων·

δοιαὶ μὲν Μενελάῳ ἀρηγόνες εἰσὶ θεάων,

Ἥρη τ’ Ἀργείη καὶ Ἀλαλκομενηῒς Ἀθήνη·

ἀλλ’ ἤτοι ταὶ νόσφι καθήμεναι εἰσορόωσαι

10 τέρπεσθον, τῷ δ’ αὖτε φιλομμειδὴς Ἀφροδίτη

αἰεὶ παρμέμβλωκε καὶ αὐτοῦ κῆρας ἀμύνει.

καὶ νῦν ἐξεσάωσεν ὀϊόμενον θανέεσθαι.

ἀλλ’ ἤτοι νίκη μὲν ἀρηϊφίλου Μενελάου·

ἡμεῖς δὲ φραζώμεθ’, ὅπως ἔσται τάδε ἔργα,

15 ἤ ῥ’ αὖτις πόλεμόν τε κακὸν καὶ φύλοπιν αἰνήν

ὄρσομεν, ἦ φιλότητα μετ’ ἀμφοτέροισι βάλωμεν.

εἰ δ’ αὖ πως τόδε πᾶσι φίλον καὶ ἡδὺ γένοιτο,

ἤτοι μὲν οἰκέοιτο πόλις Πριάμοιο ἄνακτος,

αὖτις δ’ Ἀργείην Ἑλένην Μενέλαος ἄγοιτο.

20 ὣς ἔφαθ’· αἳ δ’ ἐπέμυξαν Ἀθηναίη τε καὶ Ἥρη·

πλησίαι αἵ γ’ ἥσθην, κακὰ δὲ Τρώεσσι μεδέσθην.

ἤτοι Ἀθηναίη ἀκέων ἦν οὐδέ τι εἶπεν,

σκυζομένη Διὶ πατρί, χόλος δέ μιν ἄγριος ᾕρει·

Ἥρῃ δ’ οὐκ ἔχαδε στῆθος χόλον, ἀλλὰ προσηύδα·

25 αἰνότατε Κρονίδη, ποῖον τὸν μῦθον ἔειπες;

πῶς ἐθέλεις ἅλιον θεῖναι πόνον ἠδ’ ἀτέλεστον,

ἱδρῶ θ’ ὃν ἵδρωσα μόγῳ, καμέτην δέ μοι ἵπποι

λαὸν ἀγειρούσῃ, Πριάμῳ κακὰ τοῖό τε παισίν;

ἔρδ’· ἀτὰρ οὔ τοι πάντες ἐπαινέομεν θεοὶ ἄλλοι.

30 τὴν δὲ μέγ’ ὀχθήσας προσέφη νεφεληγερέτα Ζεύς·

δαιμονίη, τί νύ σε Πρίαμος Πριάμοιό τε παῖδες

τόσσα κακὰ ῥέζουσιν, ὅ τ’ ἀσπερχὲς μενεαίνεις

Ἰλίου ἐξαλαπάξαι ἐϋκτίμενον πτολίεθρον;

εἰ δὲ σύ γ’ εἰσελθοῦσα πύλας καὶ τείχεα μακρά

35 ὠμὸν βεβρώθοις Πρίαμον Πριάμοιό τε παῖδας

ἄλλους τε Τρῶας, τότε κεν χόλον ἐξακέσαιο;

ἔρξον ὅπως ἐθέλεις· μὴ τοῦτό γε νεῖκος ὀπίσσω

σοὶ καὶ ἐμοὶ μέγ’ ἔρισμα μετ’ ἀμφοτέροισι γένηται.

ἄλλο δέ τοι ἐρέω, σὺ δ’ ἐνὶ φρεσὶ βάλλεο σῇσιν·

40 ὁππότε κεν καὶ ἐγὼ μεμαὼς πόλιν ἐξαλαπάξαι

τὴν ἐθέλω, ὅθι τοι φίλοι ἀνέρες ἐγγεγάασιν,

μή τι διατρίβειν τὸν ἐμὸν χόλον, ἀλλά μ’ ἐᾶσαι·

καὶ γὰρ ἐγὼ σοὶ δῶκα ἑκών, ἀέκοντί γε θυμῷ.

αἳ γὰρ ὑπ’ ἠελίῳ τε καὶ οὐρανῷ ἀστερόεντι

45 ναιετάουσι πόληες ἐπιχθονίων ἀνθρώπων,

τάων μοι περὶ κῆρι τιέσκετο Ἴλιος ἱρή

καὶ Πρίαμος καὶ λαὸς ἐϋμμελίω Πριάμοιο.

οὐ γάρ μοί ποτε βωμὸς ἐδεύετο δαιτὸς ἐΐσης,

λοιβῆς τε κνίσης τε· τὸ γὰρ λάχομεν γέρας ἡμεῖς.

50 τὸν δ’ ἠμείβετ’ ἔπειτα βοῶπις πότνια Ἥρη·

ἤτοι ἐμοὶ τρεῖς μὲν πολὺ φίλταταί εἰσι πόληες,

Ἄργός τε Σπάρτη τε καὶ εὐρυάγυια Μυκήνη·

τὰς διαπέρσαι, ὅτ’ ἄν τοι ἀπέχθωνται περὶ κῆρι.

τάων οὔ τοι ἐγὼ πρόσθ’ ἵσταμαι οὐδὲ μεγαίρω.

55 εἴ περ γὰρ φθονέω τε καὶ οὐκ εἰῶ διαπέρσαι,

οὐκ ἀνύω φθονέουσ’, ἐπεὶ ἦ πολὺ φέρτερός ἐσσι.

ἀλλὰ χρὴ καὶ ἐμὸν θέμεναι πόνον οὐκ ἀτέλεστον·

καὶ γὰρ ἐγὼ θεός εἰμι, γένος δέ μοι ἔνθεν ὅθεν σοί,

καί με πρεσβυτάτην τέκετο Κρόνος ἀγκυλομήτης.

60 {ἀμφότερον, γενεῇ τε καὶ οὕνεκα σὴ παράκοιτις

κέκλημαι, σὺ δὲ πᾶσι μετ’ ἀθανάτοισιν ἀνάσσεις.}

ἀλλ’ ἤτοι μὲν ταῦθ’ ὑποείξομεν ἀλλήλοισι,

σοὶ μὲν ἐγώ, σὺ δ’ ἐμοί· ἐπὶ δ’ ἕψονται θεοὶ ἄλλοι

ἀθάνατοι. σὺ δὲ θάσσον Ἀθηναίῃ ἐπιτεῖλαι

65 ἐλθεῖν ἐς Τρώων καὶ Ἀχαιῶν φύλοπιν αἰνήν,

πειρᾶν δ’, ὥς κεν Τρῶες ὑπερκύδαντας Ἀχαιούς

ἄρξωσι πρότεροι ὑπὲρ ὅρκια δηλήσασθαι.

ὣς ἔφατ’, οὐδ’ ἀπίθησε πατὴρ ἀνδρῶν τε θεῶν τε.

αὐτίκ’ Ἀθηναίην ἔπεα πτερόεντα προσηύδα·

70 αἶψα μάλ’ ἐς στρατὸν ἐλθὲ μετὰ Τρῶας καὶ Ἀχαιούς,

πειρᾶν δ’, ὥς κεν Τρῶες ὑπερκύδαντας Ἀχαιούς

ἄρξωσι πρότεροι ὑπὲρ ὅρκια δηλήσασθαι.

ὣς εἰπὼν ὤτρυνε πάρος μεμαυῖαν Ἀθήνην,

βῆ δὲ κατ’ Οὐλύμποιο καρήνων ἀΐξασα.

75 οἷον δ’ ἀστέρα ἧκε Κρόνου πάϊς ἀγκυλομήτε͜ω

ἢ ναύτῃσι τέρας ἠὲ στρατῷ εὐρέϊ λαῶν,

λαμπρόν, τοῦ δέ τε πολλοὶ ἀπὸ σπινθῆρες ἵενται,

τῷ εἰκυῖ’ ἤϊξεν ἐπὶ χθόνα Παλλὰς Ἀθήνη,

κὰδ δ’ ἔθορ’ ἐς μέσσον· θάμβος δ’ ἔχεν εἰσορόωντας

80 Τρῶάς θ’ ἱπποδάμους καὶ ἐϋκνήμιδας Ἀχαιούς.

ὧδε δέ τις εἴπεσκεν ἰδὼν ἐς πλησίον ἄλλον·

ἤ ῥ’ αὖτις πόλεμός τε κακὸς καὶ φύλοπις αἰνή

ἔσσεται, ἦ φιλότητα μετ’ ἀμφοτέροισι τίθησιν

Ζεύς, ὅς τ’ ἀνθρώπων ταμίης πολέμοιο τέτυκται;

85 ὣς ἄρα τις εἴπεσκεν Ἀχαιῶν τε Τρώων τε.

ἣ δ’ ἀνδρὶ ἰκέλη Τρώων κατεδύσεθ’ ὅμιλον,

Λαοδόκῳ Ἀντηνορίδῃ, κρατερῷ αἰχμητῇ,

Πάνδαρον ἀντίθεον διζημένη, εἴ που ἐφεύροι.

ηὗρε Λυκάονος υἱὸν ἀμύμονά τε κρατερόν τε

90 ἑσταότ’· ἀμφὶ δέ μιν κρατεραὶ στίχες ἀσπιστάων

λαῶν, οἵ οἱ ἕποντο ἀπ’ Αἰσήποιο ῥοάων.

ἀγχοῦ δ’ ἱσταμένη ἔπεα πτερόεντα προσηύδα·

ἦ ῥά νύ μοί τι πίθοιο, Λυκάονος υἱὲ δαΐφρον;

τλαίης κεν Μενελάῳ ἐπι προέμεν ταχὺν ἰόν;

95 πᾶσι δέ κε Τρώεσσι χάριν καὶ κῦδος ἄροιο,

ἐκ πάντων δὲ μάλιστα Ἀλεξάνδρῳ βασιλῆϊ.

τοῦ κεν δὴ πάμπρωτα πάρ’ ἀγλαὰ δῶρα φέροιο,

αἴ κεν ἴδῃ Μενέλαον ἀρήϊο...

Inhaltsverzeichnis

• Cover
• Titelseite
• Impressum
• Inhalt
• Zum Text
• Vorbemerkung zu Text und kritischem Apparat
• Ilias 4 (Text und Übersetzung)